મારા શ્રીનાથજીને ગુંજાની માળા,
બીજી શોભે છે તુલસીની માળા,
મુખીયાજી સેવા કરતા જાય કરાવતા જાય,
વૈષ્ણવોને રાજી કરતા જાય
મારા શ્રીનાથજીને ગુંજાની…
મારા શ્રીનાથજીને પીળા પીતાંબર,
ઉભા છે છાંટીને ગુલાબનું અત્તર,
છાંટતા જાય છંટાવતા જાય,
ગોવાળોને રાજી કરતા જાય
મારા શ્રીનાથજીને ગુંજાની…
મારા શ્રીનાથજીને બાજુબંધ બેરખા,
કેડે રૂડા કંદોરા શોભતા,
પગમાં ઝાંઝર ઝમકાવતા જાય,
ગોપીઓને રાસ રમાડતા જાય
મારા શ્રીનાથજીને ગુંજાની…
મારા શ્રીનાથજીના વાંકડીયા કેશ,
ઉભા છે એ તો સુંદર વેષ,
વાંકડીયા કેશ ઉડાવતા જાય,
વૈષ્ણવોને દર્શન કરાવતા જાય
મારા શ્રીનાથજીને ગુંજાની…
મારા શ્રીનાથજીને અંગુઠે વેઢ,
ઉભા છે એ તો યમુનાને તટ,
મધુરીશી મોરલી વગાડતા જાય,
ગોપીઓના મન હરતા જાય
મારા શ્રીનાથજીને ગુંજાની…