આનંદ ઘડી, હેતે ભજવા હરિ,
મારો સાહેબો સોહાગી મળિયા
આનંદ ઘડી હેતે ભજવા હરિ, મારા સંતો
સાયબો સુહાગી મળિયા,
આનંદ ઘડી…
પ્રેમના રે પિયાલા મારા, ગુરુજીએ પાયા રે
જોતાં રે જોતાં તો અમને વસ્તુ જડી મારા સંતો
સાયબો સુહાગી મળિયા,
આનંદ ઘડી…
રૂદિયા કમળમાં હુવા અંજવાળા રે
તખત ત્રિવેણી ઉપર જ્યોતું જલી મારા સંતો
સાયબો સુહાગી મળિયા,
આનંદ ઘડી….
સતનો શબદ મારા ગુરુએ સુણાવ્યો રે
સુરતે ને સુરતે મેં તો નીરખ્યા હરિ મારા સંતો
સાયબો સુહાગી મળિયા,
આનંદ ઘડી…
કહે રવિરામ સંતો ! ભાણને પ્રતાપે રે
ગુરુના ભજનમાં મારી સુરતા ખડી મારા સંતો
અગમ આસન ઉપર સુરતા ચડી મારા સંતો
સાયબો સુહાગી મળિયા,
આનંદ ઘડી…