Shilvant Sadhu Ne Gujarati Bhajan Lyrics

શીલવંત સાધુને વારે વારે નમીએ,

જેનાં બદલાય નહીં વર્તમાન જો;

રામ ભરુસો રાખે હૃદયમાં જેને,

મહારાજ થયા મહેરબાન રે…..

સ્નેહ કે શત્રુ કોઈ નથી,

જેના દિલમાં પરમારથ ઉપર પ્રીત રે;

સતગુરૂ સાનમાં પૂરણ સમજે ને,

રૂડી રૂડી પાળે રીત રે……

શીલવંત સાધુને…

વહેવારની વાતો જેને ગમતી નથી,

ભજનમાં રહે ભરપૂર રે;

અલખને લખ કહી લાભ જ લેતાં,

જેનાં નેણલામાં વરસે નૂર રે

શીલવંત સાધુને….

પર ઉપકારમાં કરવા પ્રવૃત્તિ ને,

નિવૃત્તિમાં નિજ રૂપ રે;

પોતે રહીને પોષે બીજાને,

એવાં સંત સાહેબના સ્વરૂપ

શીલવંત સાધુને….

સંગત કરો તો એવા નરની કરજો,

પમાય એથી ભવ પાર;

ગંગા સતી કહે સાંભળો પાનબાઈ,

દેખાડે અલખના દ્વાર

શીલવંત સાધુને….